Psalms 80

¹A ko o beye tsebe, wena Modisa wa Iseraele; wena yo o gogang Josefe jaaka letsomane; wena yo o dutseng mo ditšherubeng, betlamela kwa ntle.

²Fa pele ga Eferaime, le Benjamine, le Manase, tsosa nonofo ya gago, mme o tle go re boloka.

³Re buse gape, Modimo o phatsimise sefatlhogo sa gago, mme re tlaa bolokwa.

⁴Jehofa, Modimo wa masomosomo, o tlaa nna o galefela morapelo wa batho ba gago ka lobaka lo lo kae?

⁵O ba jesitse bogobe jwa dikeledi, o ba nositse dikeledi mo gogolo thata.

⁶O re dira kgang mo go bagarona; mme baba ba rona ba a tshega.

⁷Baa o re buse gape, Modimo wa masomosomo; o bo o phatsimise sefatlhogo sa gago, mme re tlaa bolokwa.

⁸O ne wa lere mofine wa tswa Egepeto, wa leleka merafe, wa o tlhoma.

⁹Wa baakanya bonno fa pele ga one, mme wa melela kwa teng thata, wa ba wa tlala ka lefatshe.

¹⁰Dithaba tsa khurumediwa ke moriti wa one, le dikala tsa one tsa nna jaaka masetara a Modimo.

¹¹Wa ntshetsa dikala tsa one kwa lewatleng, le matswela a one kwa Nokeng.

¹²Ana o rutletseng dikgora tsa one, jalo botlhe ba ba fetang ka tsela ba bile ba o hula?

¹³Kolobe ya sekgwa e a o soboloka, le diphologolo tsa naga di o hula fela.

¹⁴Re a go rapela Modimo wa masomosomo, baa o bowe; okomela o le kwa legodimong o bone, mme o lekole mofine o,

¹⁵le thito e seatla sa gago se segolo se e tlhomileng, le kala e o e ithatafaleditseng.

¹⁶O fisitswe ka molelo, o remilwe; ba nyelela ka kgalemo ya sefatlhogo sa gago.

¹⁷A seatla sa gago se nne mo monneng wa letsogo la gago le legolo, mo go morwa motho yo o mo ithatafaleditseng.

¹⁸Jalo ga re ketla re go hularela; re rudise, mme re tlaa bitsa leina la gago.

¹⁹Baa o re buse, Jehofa, Modimo wa masomosomo; phatsimisa sefatlhogo sa gago, mme re tlaa bolokwa.