Psalms 81

¹Opelelang Modimo, thata ya rona, ka mantswe a a tsholetsegileng; dudueletsang Modimo wa ga Jakobe ka boitumelo.

²Tlhabeletsang pesalema, lereng kwano moropana, harepe e e natefang le saletare.

³A go lediweng lonaka mo thogong ya kgwedi, fa kgwedi e le tshweu, mo letsatsing la modiro wa rona o o masisi.

⁴Gonne ke tao mo go Iseraele, ke mo go laotsweng ke Modimo wa ga Jakobe.

⁵O go tlhomile mo go Josefe go nna tshupo, jale ka a ralala lefatshe la Egepeto, kwa ke utlwileng puo gone, e ke neng ke sa e itse.

⁶“Ka tlosa lerudi la gagwe mo morwalong; diatla tsa gagwe tsa gololwa mo serotong.

⁷E rile o le mo tlalelong wa bitsa, mme ka go golola; ka go araba mo felong ga boiphitlhelo ga tumo ya maru; ka go leka fa metsing a Meriba. Sela.

⁸“A ko o utlwe, tšhaba ya me, mme ke tlaa go supetsa; wena Iseraele, fa o ka bo o ne o ka ntheetsa!

⁹A go se nne modimo ope wa seeng mo go wena; le gone o se ka wa obamela modimo ope wa seeng.

¹⁰Ke nna Jehofa, Modimo wa gago, yo ke go tlhatlositseng mo lefatsheng la Egepeto; atlhamolosa legano la gago, mme ke tlaa le tlatsa.

¹¹“Mme batho ba me ga ba a ka ba reetsa lentswe la me; Iseraele ga a ka a nthaya sepe.

¹²Jalo ka ba lesa ba latela kgwalalo ya pelo tsa bone, gore ba tle ba tsamaye mo dikgakololong tsa bone fela.

¹³Ao, a bo batho ba me ba ka bo ba ntheetsa, Iseraele le ene o kabo a tsamaya mo ditseleng tsa me!

¹⁴Ke ne ke tlaa akofa ke fenya baba ba bone, ke phetsolela letsogo la me kwa baganetsing ba bone.

¹⁵Baidi ba ga Jehofa ba ne ba tlaa ineela mo go ene; mme lobaka lwa bone lo ne lo tlaa nna ka bosakhutleng.

¹⁶Le gone o ne a tlaa ba jesa mabele a mantlentle bogolo; ke ne ke tlaa go kgorisa ka dinotshe tse di tswang mo lefikeng.”