Psalms 83

¹Modimo, o se ka wa didimala fela; o se ka wa ikitsa go bua; se nne fela, Modimo.

²Gonne bona, baba ba gago ba dira pheretlho; le ba ba go tlhoileng ba tsholeditse tlhogo.

³Ba logela batho ba gago kgakololano ya boferefere; ba gakololanela ba gago ba ba subegileng.

⁴Ba rile: “Tlang, a re ba kgaoleng go tlhola e le morafe; gore leina la Iseraele le se tlhole le gopolwa gope.”

⁵Gonne ba gakololanye ka tumalano e le nngwe fela; e le wena yo ba go golaganelang;

⁶megope ya Etome, ya Baišemaele; Moabe le Bahagare;

⁷Gebale, Amone le Amaleke; Filisitia o na le banni ba Ture;

⁸Asiria le ene o ikopantse nabo; ba thusitse bana ba ga Lote. Sela.

⁹Ba direle jaaka o diretse Midiane; le jaaka Sisere, le jaaka Jabine, fa nokeng ya Kišone;

¹⁰ba ba nyeletseng kwa Entore; ba ba ba nna jaaka letshotelo la tshimo.

¹¹Dira bagolwane ba bone gore ba nne jaaka Orebe le Seebe; ee, dikgosana tsotlhe tsa bone di nne jaaka Seba le Salemuna;

¹²ba ba kileng ba re: “A re itseeleng maago a Modimo go a rua.”

¹³Modimo wa me, ba dire gore ba nne jaaka lorole lo lo sokeletsegang; jaaka phofedi fa pele ga phefo.

¹⁴Jaaka molelo o o lakailang sekgwa, le jaaka kgabo ya molelo e e tshubelang dithaba;

¹⁵ba khukhele jalo ka ledimo le legolo la gago le le boitshegang; o ba boifise ka matsubutsubu a gago.

¹⁶A difatlhogo tsa bone di tladiwe tshosobagano; gore ba tle ba batle leina la gago, Jehofa.

¹⁷A ba tlhajwe ke ditlhong, ba tseanngwe ka bosakhutleng; ee, ba swabisiwe ba nyelele;

¹⁸gore ba tle ba itse fa wena wesi; yo leina la gago e leng Jehofa, o le Mogodimodimo, o okame lefatshe lotlhe.