Psalms 84

¹Ana metlaagana ya gago e mentlentle jang, wena Jehofa wa masomosomo!

²Mowa wa me o tlhologeletswe, ee, o idibalela fela malwapa a ga Jehofa; pelo ya me le nama ya me di kurueletsa Modimo o o tshedileng.

³Ee, thaga e iponetse ntlo, le peolwane setlhaga, fa e ka bayang mamphorwana a yone gone, e bong dibeso tsa gago, Jehofa wa masomosomo, Kgosi ya me, le Modimo wa me.

⁴Go sego ba ba agileng mo ntlong ya gago; ba tlaa fela ba ntse ba go baka. Sela.

⁵Go sego motho yo thata ya gagwe e leng mo go wena; yo ditsela tse di yang Sione di leng mo pelong ya gagwe.

⁶Ba e reng ba ralala mokgatšha wa Maselelo, ba o phunye metswedi; ee, pula ya sephai e o khurumetse ka masego.

⁷Ba etla ba tlhomagantse thata le thata; mongwe le mongwe wa bone o ya go bonala fa pele ga Modimo mo Sione.

⁸Jehofa Modimo wa masomosomo, a ko o utlwe morapelo wa me; baya tsebe Modimo wa ga Jakobe. Sela.

⁹Bona, Modimo thebe ya rona, mme o lebe sefatlhogo sa motlodiwa wa gago.

¹⁰Gonne letsatsi le le lengwe fela mo malwapeng a gago, le gaisa malatsi a a makgolo a le some. Ke rata ka nna molebedi wa kgoro mo ntlong ya Modimo bogolo go go aga mo megopeng ya boikepo.

¹¹Gonne Jehofa Modimo ke letsatsi le thebe; o tlaa aba tshegofatso le kgalalelo; ga go na sepe se se molemo se o tlaa ganang ka sone mo go ba ba tsamayang ka thokgamo.

¹²Jehofa wa masomosomo, go sego motho yo o ikantseng mo go wena.