Psalms 94

¹Jehofa, wena Modimo o pusoloso e leng ya gago, wena Modimo o pusoloso e leng ya gago, betlamela ntle.

²Wena moatlhodi wa lefatshe, itsholetse; naya ba bopelompe maduo a bone.

³Jehofa, baikepi ba tlaa nna goleele go le kaye; baikepi ba tlaa ja koma goleele go le kaye?

⁴Ba a balabala, ba bua ka boitelaganyo; badira tshiamololo botlhe ba a ipelafatsa.

⁵Ba phatlakanya batho ba gago, Jehofa; ba tlhokofatsa boswa jwa gago.

⁶Ba tle ba bolaye mosadi wa motlholagadi le moeng ba swe, ba matle masiela.

⁷Mme ba re: “Jehofa ga a ketla a bona, le gone Modimo wa ga Jakobe ga o ketla o tlhokomela.”

⁸Tlhokomelang, lona ba lo leng dieleele mo bathong; le lona masilo lo tlaa tlhalefa leng?

⁹Ene yo o tlhomileng tsebe, a ga a ketla a utlwa? Ene yo o bopileng leitlho, a ga a ketla a bona?

¹⁰Ene yo o otlhayang merafe, a ga a ketla a siamisa, e bong ene yo o rutang motho kitso?

¹¹Jehofa o itse megopolo ya motho fa e le lefela fela.

¹²Go sego monna yo o mo otlhayang, Jehofa, o mo ruta ka molao wa gago;

¹³gore o tle o mo neye go ikhutsetsa metlha ya pitlagano, go tsamaye lemena le epelwe baikepi.

¹⁴Gonne Jehofa ga a ketla a latlha batho ba gagwe, le gone ga a ketla a tlhala boswa jwa gagwe.

¹⁵Gonne katlholo e tlaa boela mo tshiamong; le botlhe ba ba thokgameng mo pelong ba tlaa e sala morago.

¹⁶E mang yo o tlaa nkemang nokeng a ntlhabantsha le badira bosula? E mang yo o tlaa nkemelang a ntlhabantsha le badira boikepo?

¹⁷Fa Jehofa a ka bo a se ka a nna thuso ya me, mowa wa me o ka bo o akofile wa aga mo tidimalong.

¹⁸E rile ke re: “Lonao lwa me lo a relela,” boutlwelobotlhoko jwa gago Jehofa, jwa ntshegetsa.

¹⁹Mo bontsing jwa megopolo ya me e e mo teng ga me, dikgomotso tsa gago di tle di jese mowa wa me monate.

²⁰A bonno jwa tshiamololo bo tlaa amogana nao, e le se se baakanyang bosenyi ka molao?

²¹Ba iphuthela mowa wa mosiami, ba ba ba sekisa batho ba ba se nang molato.

²²Jehofa e ntse e le ene kago ya me e e godileng ya phemelo; le Modimo wa me e ntse ke one lefika la botshabelo jwa me.

²³Mme o ba lereditse boikepo jwa bone tota, o tlaa ba kgaola ba le mo bosuleng jwa bone tota; Jehofa, Modimo wa rona o tlaa ba kgaola.