Psalms 97

¹Jehofa o a busa; a lefatshe le ipele; a ditlhake tse dintsi di itumele.

²Maru a mo dikanyeditse le lefifi; tshiamo le katlholo ke motheo wa setulo sa gagwe sa bogosi.

³Molelo o tsamaya fa pele ga gagwe, mme o fisetsa ruri baba ba gagwe mo tikologong.

⁴Dikgadima tsa gagwe tsa bonesa lobopo; lefatshe la bona la roroma.

⁵Dithabana tsa nyerologa jaaka makgaga a dinotshe ka sebonalo sa ga Jehofa, ka sefatlhogo sa Morena wa lefatshe lotlhe.

⁶Magodimo a kakanya tshiamo ya gagwe, le ditšhaba tsotlhe di bonye kgalalelo ya gagwe.

⁷A go tlhajwe ke ditlhong bone botlhe ba ba direlang ditshwantsho tse di setilweng, ba ba ipelafatsang ka medimo ya disetwa; obamelang ene, lona medimo yotlhe.

⁸Sione a utlwa, mme a itumela, le bomorwadia Juta ba ipela; ka ntlha ya dikatlholo tsa gago, Jehofa.

⁹Gonne, wena, Jehofa, O mogodimo o mogolo, godimo ga lefatshe lotlhe; o goleleditswe kgakala godimo ga medimo yotlhe.

¹⁰Lona ba lo ratang Jehofa, a ko lo ileng bosula; o tlamela mewa ya baitshepi ba gagwe; o ba golola mo seatleng sa baikepi.

¹¹Lesedi le jaletswe basiami; boipelo le jone bo jaletswe ba ba thokgameng mo pelong.

¹²Ipeleng mo go Jehofa lona basiami; lo ntshetse leina la gagwe le le boitshepo malebogo.