Isaiah 39

¹E rile ka lobaka loo Merotake-balatane morwa Balatane kgosi ya Babilone, a isa dikwalo le neo ka barongwa kwa go Hesekia, gonne a utlwa fa a kile a lwala mme a fodile.

²Hesekia a ba itumelela, a ba supetsa ntlo ya dilo tsa gagwe tsa botlhokwa, selefera, le gouta le tsa malao le lookwane lwa botlhokwa, le tsotlhe tse di ka fitlhelwang mo dikhumong tsa gagwe; ga se ka ga nna le sepe mo ntlong ya gagwe, le fa e le mo pusong yotlhe ya gagwe, se Hesekia o se kang a se ba bontsha.

³Foo ga tla moperofeti Isaia kwa go Hesekia kgosi, a mo raya a re: “Banna bao ba rileng? Mme ba go tswetse kae?” Hesekia a re: “Ba ntswetse kwa lefatsheng le le kgakala, e bong kwa Babilone.”

⁴Foo a re: “Ba bonye eng mo ntlong ya gago?” Hesekia a mo fetola a re: “Tsotlhe fela tse di mo ntlong ya me ba di bonye; ga go na sepe mo dikhumong tsa me se ke sa se ba bontshang.”

⁵Foo Isaia a raya Hesekia a re: “Utlwa lefoko la ga Jehofa wa masomosomo:

⁶Bona, malatsi a etla, a dilo tsotlhe tse di mo ntlong ya gago, le tse borraeno ba ntseng ba di baya, ba di boloka, go tlaa go fitlha mo letsatsing leno, di tlaa isiwang kwa Babilone ka one; ga go ketla go tlogelwa sepe, go bua Jehofa.

⁷Le bomorwao ba ba tlaa tswang mo go wena, ba o ba tsholang, ba tlaa ba tlosa; ba tlaa nna baopafadiwa mo ntlong e kgolo ya kgosi ya Babilone.”

⁸Foo Hesekia a raya Isaia, a re: “Lefoko la ga Jehofa le o le buileng le molemo.” Gape a re: “Gonne go tlaa nna kagiso le boammaaruri mo malatsing a me.”