Isaiah 42

¹“Bonang motlhanka wa me, yo ke mo tshegeditseng; moitshenkedwi wa me yo mowa wa me o natefelwang mo go ene; ke beile mowa wa me mo go ene; o tlaa ntshetsa tshiamiso kwa merafeng.

²Ga a ketla a goa, le fa e le go tsholetsa lentswe la gagwe, le fa e le go le utlwatsa mo mmileng.

³Lotlhaka lo lo phitsegileng ga a ketla a lo roba, le lodi lo lo kukelang ga a ketla a lo tima; o tlaa ntsha tshiamiso mo boammaaruring.

⁴Ga a ketla a tlhaela le fa e le go lapa pelo go tsamaye a tlhome tshiamiso mo lefatsheng pele; mme ditlhake di tlaa lebelela molao wa gagwe.”

⁵Go bua jaana Modimo, Jehofa, ene yo o tlhodileng magodimo, a a phutholola; yo o ritibaditseng lefatshe le se se tlhogang mo go lone; yo o nayang batho ba ba mo go lone go hema, le ba ba tsamayang mo go lone mowa, a re:

⁶“Nna Jehofa ke go biditse mo tshiamong, ke tlaa tshwara seatla sa gago, ke go dibela; ke tlaa go ntsha, gore o nne kgolagano ya batho, o bo o nne lesedi la merafe;

⁷go budulola matlho a a foufetseng; go ntsha bagolegwi mo moleteng o o lefifi, le ba ba dutseng mo lefifing go ba ntsha mo ntlong ya kgolegelo.

⁸Ke nna Jehofa; ke lone leina la me; le kgalalelo ya me ga nketla ke e naya o sele, le fa e le pako ya me dithswantsho tse di setilweng.

⁹Bonang, dilo tsa pele di dirafetse, ke bile ke bolela dilo tse dintšha; ke di lo bolelela pele di e se di tswele kwa ntle.”

¹⁰Opelelang Jehofa sefela se seša, le pako ya gagwe go tswa bokhutlong jwa lefatshe; lona ba lo fologelang mo lewatleng, le tsotlhe tse di mo go lone; le ditlhake le banni ba tsone.

¹¹A naga le metse ya teng e tsholetse mantswe a yone, metsana e Ketara o nnang mo go yone; a banni ba Sela ba opele, a ba kue ba le godimo ga dithaba.

¹²A ba neye Jehofa kgalalelo, ba bolele pako ya gagwe mo ditlhakeng.

¹³Jehofa o tlaa bolola jaaka monna wa seganka; o tlaa tsosa tlhotlheletso jaaka monna a ya dira; o tlaa goelela, ee, o tlaa goa ka thata; o tlaa dira ka nonofo mo babeng ba gagwe.

¹⁴“Ga ke bolo go nna ke didimetse fela; ke ntse ke tuuletse fela ke ikganetse; jaanong ke tlaa goela godimo jaaka mosadi yo o mo pelegong; ke tlaa sonela ke kolometsa go le gongwe fela.

¹⁵Ke tlaa kgakgabatsa dithaba le makhujana, ke omeletsa merogo yotlhe ya tsone; dinoka ke tlaa di dira ditlhake le megobe ke tlaa e kgadisa.

¹⁶Ke tlaa tsamaisa difofu ka tsela e di sa e itseng; ke tlaa di goga mo ditselaneng tse di sa di itseng; lefifi ke tlaa le sedifatsa fa pele ga bone, ke lolamisa mafelo a a kgopameng. Dilo tse ke tlaa di dira, mme ga nketla ke ba latlha.

¹⁷Ba ba ikanyang ditshwantsho tsa disetwa, ba raya ditshwantsho tse di thetsweng ba re: ‘Lo medimo ya rona.’ ba tlaa bosediwa morago, ba tlhajwa ke ditlhong ruri.”

¹⁸“Utlwang lona ba lo bosusu; lo lebe lona difofu gore lo bone.

¹⁹Go sefofu mang fa e se motlhanka wa me? Gongwe yo o bosusu e mang jaaka morongwa wa me yo ke mo romang? Go sefofu mang jaaka yo ke ntseng kagiso nae? Le sefofu jaaka motlhanka wa ga Jehofa?

²⁰O bona dilo di le dintsi, mme ga o di tlhokomele; ditsebe tsa gagwe di kabologile, mme ga a utlwe.”

²¹Ga kgatlha Jehofa, ka ntlha ya tshiamo ya gagwe, go godisa molao le go o dira gore o nne tlotlego.

²²Mme eno e, ke tšhaba e e gapetsweng, e e thopilweng; botlhe ba tshwerwe mo didukung, ba fitlhilwe mo matlong a dikgolegelo; ba ntse kgapo fela, mme go se na ope yo o gololang; ba ntse thopo fela, mme go se na ope yo o reng; “Ba rebolwe.”

²³Go mang mo go lona yo o tlaa beelang golo mo tsebe? Yo o tlaa reetsang a utlwela lobaka lo lo tlaa tlang?

²⁴E mang yo o neetseng Jakobe gore a nne thopo, a neela Iseraele dinokwane? A ga se Jehofa? Ene yo re mo leofetseng, yo ditsela tsa gagwe ba ganneng go tsamaya mo go tsone, le fa e le go utlwa molao wa gagwe.

²⁵Ke gone ka mo o goromeditseng mo go ene tšhakgalo ya bogale jwa gagwe, le bokete jwa tlhabano; mme jwa mo tshuba mo tikologong; le fa go ntse jalo o ne a sa itse; mme jwa mo fisa, le fa go ntse jalo ga a ka a go baya mo pelong.