Isaiah 43

¹Mme jaanong, go bua jaana Jehofa yo o go tlhodileng, wena Jakobe, ene yo o go bopileng, wena Iseraele; a re: “O se ka wa boifa, gonne ke go rekolotse; ke go biditse ka leina la gago, o wa me.

²E tlaa re o ralala metsi ke tlaa bo ke na nao; le o ralala dinoka ga di ketla di go penamela; mogang o ralalang molelo, ga o ketla o ša; le kgabo ga e ketla e tuka mo go wena.

³Gonne ke Jehofa Modimo wa gago, Moitshepi wa Iseraele, mmoloki wa gago; ke ntshitse Egepeto go nna serekololo sa gago, ka ntsha Ethiopia le Seba boemong jwa gago.

⁴E re ka o ntse o le seetlaetlana mo matlhong a me, o le tlotlego, mme ke go ratile, ke gone ke tlaa ntshang batho boemong jwa gago, le ditšhaba boemong jwa botshelo jwa gago.

⁵O se ka wa boifa; gonne ke na nao; ke tlaa tlisa losika lwa gago lo tswa kwa botlhabatsatsi, ke go phutha go tswa bophirimatsatsi.

⁶Ke tlaa raya Botsheka ke re: ‘Ntsha;’ ke raya Borwa ke re: ‘Se kganele;’ tlisang bomorwaake go tswa kgakala, le bomorwadiake go tswa sekhutlong sa lefatshe.

⁷E bong mongwe le mongwe yo o bidiwang ka leina la me, yo ke bileng ka mo tlholela kgalalelo ya me; nna ke mmopile; ee, nna ke mo dirile.”

⁸Ntshang ba ba difofu tse di nang le matlho, le ba ba bosusu ba ba nang le ditsebe.

⁹A merafe yotlhe e phuthwe, a ditšhaba di kokoanngwe; e mang mo go bone yo o ka bolelang golo mo, a re supetsa dilo tsa pele? A ba tlise basupi ba bone, gore ba tle ba siamisiwe; kgotsa a ba utlwe, mme a ba re: “Ke boammaaruri.”

¹⁰“Lona lo basupi ba me,” go bua Jehofa: “o bile o motlhanka wa me yo ke go itshenketseng; gore lo tle lo itse, lo ntumele, lo bo lo tlhaloganye fa ke le ene; e rile pele ga me ga bo go sa bopiwa modimo ope, le gone ga go ketla go nna ope morago ga me.

¹¹Nna e leng nna, ke Jehofa, mme kwa ntle ga me ga go na mmoloki ope.

¹²Ke kakantse, ke bolokile, ke supile, mme go ne go se na modimo ope wa seeng mo go lona: ke gone lo leng basupi ba me,” go bua Jehofa, “mme ke nna Modimo.

¹³Ee, e sa le ka go nna motshegare ke ntse ke le one; mme ga go na ope yo o ka gololang mo seatleng sa me; ke tlaa nna ke dira fela, mme e mang yo o tlaa kgoreletsang?”

¹⁴Go bua jaana, Jehofa, morekolodi wa lona, Moitshepi wa Iseraele; a re: “Ke romile kwa Babilone ka ntlha ya lona, mme ke tlaa ba folosa botlhe fela jaaka bafaladi, e bong Bakalatea ba le mo dikepeng tsa bone tse ba di itumelelang.

¹⁵Ke nna Jehofa Moitshepi wa lona, Motlhodi wa Iseraele, Kgosi ya lona.”

¹⁶Go bua Jehofa yo o dirang mmila mo lewatleng, le tsela mo metsing a a bokete jo bo thata;

¹⁷yo o bolotsang kara ya tlhabano le pitse, ntwa le nonofo; ba lalaana mmogo, ga ba ketla ba tsoga, ba figitlhegetse, ba timile jaaka lodi:

¹⁸“Lo se ka lwa gakologelwa dilo tsa pele, le gone lo se ka lwa akanya dilo tsa bogologolo.

¹⁹Bonang, ke tlaa dira sengwe se seša; se tlaa runya jaana jaana; a ga lo ketla lo se itse? ke tlaa dira tsela fela mo nageng, le dinoka mo sekakeng.

²⁰Ditshedi tsa naga di tlaa ntlotla, diphokoje le bontšhe; gonne ke baya metsi mo nageng, le dinoka mo sekakeng go tla ke nosa batho ba me, baitshenkedwi ba me:

²¹E bong batho ba ke ba ipopetseng, gore ba tle ba ranole pako ya me.”

²²“Le fa go ntse jalo ga o a mpitsa, wena Jakobe; mme o lapisitswe ke nna, wena Iseraele.

²³Ga o a nteretse dikwanyana tsa ditshupelo tsa gago tsa phiso; le gone ga o a ntlotla ka ditlhabelo tsa gago. Nna, ga ke a go kgwelea ka ditshupelo, le gone ga ke a go lapisa ka maswalo.

²⁴Wena ga o a nthekela ntšhe ka madi, le gone ga o a nnyamuka ka mafura a ditlhabelo tsa gago: o nkimedisitse ka maleo a gago, o ntapisitse ka maikepo a gago.

²⁵Ke nna, e leng nna, yo ke phimolang ditlolo tsa gago ka ntlha ya me; le maleo a gago ga nketla ke a gakologelwa.

²⁶O tle o nkgakolole; a re rapelane; ranola kgang ya gago, gore o tle o siamisiwe.

²⁷Rraago wa ntlha o ne a leofa, le baphuthololedi ba gago ba tlodile fa pele ga me.

²⁸Ke gone ka moo ke tlaa tlhapatsang dikgosana tsa felo ga boitshepo, ke tlaa dira Jakobe seneelelwa, le Iseraele kgobo.