Isaiah 49

¹Ntheetsang, lona ditlhake; lo reetse, lona ditšhaba lo le kgakala; Jehofa o mpiditse ke sa le ke tswa sebopelong; ke sa le ke tswa mo maleng a ga mme o ntse a umaka leina la me.

²O dirile molomo wa me go nna jaaka tšhaka e e bogale; o mphitlhile mo moriting wa seatla sa gagwe; o ntirile motswi o o gotlhegileng, o mpolokile thata mo mokotlopong wa gagwe.

³A nthaya a re: “O motlhanka wa me; o Iseraele, yo ke tlaa galalediwang mo go wena.”

⁴Mme nna ka re: “Ke diretse lefela, ke feditse thata ya me ka bosengsepe le ka boithamako fela; le fa go ntse jalo ruri go siamisiwa ga me go tlaa bo go le mo go Jehofa, le tuelo ya me mo Modimong wa me.”

⁵Jaana, go bua Jehofa, yo o mpopetseng go nna motlhanka wa gagwe ke sa le ke tswa sebopelong, go tlaa ke busetsa Jakobe kwa go ene, le gore Iseraele a phuthelwe kwa go ene; (gonne aitse nna, ke tlotlego mo matlhong a ga Jehofa, Modimo wa me o diregile thata ya me).

⁶Ee, a re: “Ke selo se se motlhofo bobe fa o ka nna motlhanka wa me gosi, go tsosa ditso tsa ga Jakobe, le go busa ba ba neng ba bolokilwe ba Iseraele; le gone ke tlaa go ntsha gore o nne lesedi la merafe, gore o tle o nne poloka ya me kwa sekhutlong sa lefatshe.”

⁷Go bua jaana Jehofa, morekolodi wa Iseraele, le Moitshepi wa gagwe, o raya ene yo motho o mo nyatsang, ene yo o fedisang morafe pelo, le motlhanka wa balaodi, a re: “Dikgosi di tlaa bona di ba di nanoga; dikgosana di tlaa obama; ka ntlha ya ga Jehofa yo o boikanngo, e bong Moitshepi wa Iseraele yo o go itshenketseng.”

⁸Go bua jaana Jehofa, a re: “Ke go arabile mo lobakeng lo lo lebosegang le mo letsatsing le e leng la poloko ke go thusitse; mme ke tlaa go dibela, ke go ntsha gore o nne kgolagano ya batho go rudisa lefatshe, le go ba jesa maswa a a swafetseng;

⁹go raya bagolegwi, go re: ‘Tswang;’ go raya ba ba mo lefifing go re: ‘Iponatseng.’ Ba tlaa fula mo ditseleng, mme bofulo jwa bone bo tlaa nna mo dithoteng tse di leforotlho.

¹⁰Ga ba ketla ba bolawa ke tlala, le fa e le ke lenyora; le mogote ga o ketla o ba tlhapela le fa e le letsatsi; gonne ene yo o ba utlwelang botlhoko o tlaa ba goga, le ka fa go e e leng metswedi ya metsi o tlaa ba etelela pele.

¹¹“Dithaba tsa me tsotlhe ke tlaa di dira tsela, le ditsela tsa me tsa meheru di tlaa goletsega.

¹²Bonang, ba, ba tlaa tswa kgakala; mme bonang ba, ba tlaa tswa botsheka le kwa bophirimatsatsi; le ba, ba tlaa tswa lefatsheng la Sinime.”

¹³Opelang, lona magodimo; o ipele wena lefatshe; ponyegang mo kopelong, lona dithaba; gonne Jehofa o gomoditse batho ba gagwe; mme o tlaa tlhomogela babogisiwa ba gagwe pelo.

¹⁴Sione ene a re: “Jehofa o ntlhadile, Morena o ntebetse.”

¹⁵“A mosadi o ka lebala losea lwa gagwe lo lo anyang, gore a tle a se ka a tlhomogela ngwana wa sebopelo sa gagwe pelo? Ee, bao ba ka tla ba lebala, mme wena, le fa go ntse jalo ga nketla ke go lebala.

¹⁶Bona ke go setile ka fa teng ga diatla tsa me; dithako tsa gago di ntse fa pele ga me ka gale le ka gale.

¹⁷Bana ba gago ba a akofa; basenyi ba gago ba ba go kgakgabaditseng ba tswa mo go wena.

¹⁸Tsholetsa matlho a gago o lebalebe, o bone; bao, botlhe, ba a phuthega, ba tla mo go wena. Jaaka ke tshedile, go bua Jehofa, o tlaa ikapesa ka bone botlhe jaaka ka mokgabo, o ikgoma ka bone jaaka monyadwi.

¹⁹“Gonne, ka ga mafelo a a kgakgabetseng a gago, le a a swafetseng, le lefatshe la gago le le sentsweng, ruri jaanong, banni ba tlaa pitlagana bobe, mme ba ba kileng ba go kometsa ba tlaa nna kwa kgakala.

²⁰Bana ba tatlhegelo ya gago ba tlaa nama ba bua mo ditsebeng tsa gago, ba re: ‘Ke pitlaganye mo felong fa, nkatogela, gore ke nne.’

²¹Foo o tlaa ithaya mo pelong, o re: ‘Ana emang yo o ntsaletseng bone ba, etswa ke ne ke latlhegetswe ke bana ba me, ke le mokojwi, ke le mofaladi, ke kailakaila fela? Emang yo o otlileng bone ba? Bona, ke ne ke tlogetswe ke le nosi; bone ba, ba ne ba le kae?’ ”

²²Go bua jaana Morena Modimo, a re: “Bonang ke tlaa tsholeletsa merafe seatla sa me, ke tlhomela ditšhaba mokgele wa me, mme ba tlaa tlisa bomorwao mo difubeng tsa bone, le bomorwadio ba tlaa sikarwa mo maruding a bone.

²³Dikgosi di tlaa nna borraago ba ba go otlang, le bahumagadi ba tsone bommaago ba ba go otlang; di tlaa go ikobela di isa difatlhogo tsa tsone mo mmung, di latswa lorole lwa dinao tsa gago; mme o tlaa itse fa ke le Jehofa, le go re ba ba ntebelelang ga ba ketla ba tlhajwa ke ditlhong.”

²⁴A thopo e tlaa tseelwa diganka, kgotsa ba ba golegilweng ka fa tshwanong a ba tlaa gololwa?

²⁵Go bua jaana Jehofa, a re: “Le ba e leng bagolegwi ba diganka ba tlaa tsewa, le se se gapilweng ke ba ba boitshegang se tlaa gololwa; gonne ke tlaa ganela le ene yo o ganelang nao, mme ke tlaa boloka bana ba gago.

²⁶Ba ba go patikang ke tlaa ba jesa nama ya bone; ba tlaa tagwa ke madi a bone, jaaka ka bojalwa jo bo botshe; mme nama yotlhe e tlaa itse go re Nna Jehofa ke mmoloki wa gago le morekolodi wa gago, Mothata wa ga Jakobe.”