Isaiah 62

¹Ka ntlha ya Sione ga nketla ke didimala, le ka ntlha ya Jerusalema ga nketla ke itapolosa, go tsamaya tshiamo ya gagwe e tswela kwa ntle jaaka phatsimo, le poloko ya gagwe jaaka lobone lo lo tukang.

²Merafe e tlaa bona tshiamo ya gago, le dikgosi tsotlhe kgalalelo ya gago, mme o tlaa retwa ka leina le leša le molomo wa ga Jehofa o tlaa le go rayang.

³Le gone o tlaa nna serwalo sa bogosi se sentle mo seatleng sa ga Jehofa, le mofapatlhogo wa segosi mo seatleng sa Modimo wa gago.

⁴Ga o ketla o tlhola o bidiwa Molatlhiwa; le gone lefatshe la gago ga le ketla le tlhola le bidiwa Marope; mme wena o tlaa bidiwa Hefesiba, le lefatshe la gago le tlaa bidiwa Beula, gonne Jehofa o kgatlhega thata mo go wena, le lefatshe la gago le tlaa nyalwa.

⁵Gonne jaaka lekau le tle le nyale kgarebane, jalo bomorwao ba tlaa go nyala; le jaaka monyadi a tle a itumelele monyadwi, Modimo wa gago o tlaa itumelela wena fela jalo.

⁶Ke tlhomile balebedi mo dithakong tsa gago wena Jerusalema, ga ba ketla ba didimala gope motshegare le bosigo, lona ba lo leng bagakolodi ba ga Jehofa.

⁷Go se ka ga itapolosa lona, le ene lo se ka lwa mo lesa a itapolosa, go tsamaya a tlhomamisa, le go tsamaya a dira Jerusalema pako mo lefatsheng pele.

⁸Jehofa o ikanne ka seatla sa gagwe se segolo le ka letsogo la thata ya gagwe, a re: “Ruri ga nketla ke tlhola ke ntsha mabele a gago go nna dijo tsa baba ba gago; le gone baeng ga ba ketla ba nwa bojalwa jwa mofine jwa gago, jo o ineileng letsapa ka ga jone.

⁹Mme bone ba ba a roretseng mo disoeng ba tlaa a ja, ba baka Jehofa; le ba ba hodileng ba tlaa bo nwela mo malwapeng a felo ga me ga boitshepo.”

¹⁰Tsenang, tsenang ka dikgoro; baakanyang tsela ya batho; tlhatlosang, tlhatlosang tsela ya mheru; olang maje; tsholeletsang ditšhaba mokgele.

¹¹Bonang, Jehofa o boletse le kwa sekhutlong sa lefatshe, a re: Rayang morwadia Sione lo re: “Bona, Poloka ya gago o etla, bona, tuelo ya gagwe o na nayo, le maduo a gagwe a fa pele ga gagwe.”

¹²Mme ba tlaa ba raya ba re: Batho ba ba boitshepo, Barekolodiwi ba ga Jehofa; mme wena o tlaa bidiwa Mmatlilwi, Motse o o sa tlogelwang.