Jeremiah 46

¹Lefoko la ga Jehofa le le tsileng mo go Jeremia moperofeti ka ga merafe.

²Ka ga Egepeto; ka ga ntwa ya ga Faro Neko kgosi ya Egepeto, e e neng e le fa nokeng ya Euferatese, mo Karekemiše, e Nebukatenesare kgosi ya Babilone o e kgemethileng ka ngwaga wa bone wa ga Jehoiakime morwa Josia, kgosi ya Juta.

³“Baakanyang thejana le thebe, mme lo atamele go tlhabana.

⁴Golegang dipitse, palamang, lona bapalami, ikemiseng ka ditlhoro tsa phemelo tsa lona; gotlhang marumo, Aparang meitshomelo ya phemelo.

⁵Ana ke go bonye ka ntlha yang? Ba a tseanngwa, ba buseditswe kwa morago; diganka tsa bone di batantswe, mme di tshabile ka thata di sa šebe kwa morago; theregiso e mo ntlheng tsotlhe, go bua Jehofa.

⁶Yo o bofefo a a se tshabe, a seganka se se falole; ntlheng ya botsheka fa nokeng ya Euferatese ba kgopilwe ba ole.

⁷“Emang yo, yo o hohomogang jaaka Nile, e metsi a yone a itlolakisang jaaka dinoka?

⁸Egepeto o hohomoga jaaka Nile, mme metsi a gagwe a itlolakisa jaaka dinoka; mme a re: ‘Ke tlaa nanoga, ke khurumetsa lefatshe; ke tlaa senya motse le banni ba one.’

⁹Tlhatlogang, lona dipitse; šakgalang, lona dikara; mme a diganka tsa ntwa di tswele pele; ba Kuše le ba Pute, ba ba itseng go tshwara thebe; le Balute ba ba itseng go tshwara le go oba bora.

¹⁰Gonne letsatsi leo ke letsatsi lengwe la ga Jehofa, Jehofa wa masomosomo, letsatsi la tefetso, gore a tle a itefetse mo babeng ba gagwe; mme tšhaka e tlaa suputsa, e kgora, e tlaa nwa madi a bone ya kgora; gonne Jehofa, Modimo wa masomosomo o na le tlhabelo mo lefatsheng la botsheka fa nokeng ya Euferatese.

¹¹“Tlhatlogela kwa Gileate, mme o tseye gone boroku jo bo alafang, wena morwadia Egepeto wa kgarebana; o nwela melemo e le mentsi lefela; ga o na go fola.

¹²Merafe e utlwetse ditlhong tsa gago, le lefatshe le tletse go goa ga gago; gonne seganka se thulakanye le seganka, di ole tsoo pedi mmogo.”

¹³Lefoko le Jehofa o le buileng le Jeremia moperofeti, la ka fa Nebukatenesare kgosi ya Babilone o tlaa tlang ka gone a kgemetha lefatshe la Egepeto.

¹⁴“Bolelang mo Egepeto, lo utlwatse mo Migetole, lo bo lo utlwatse mo Nofe le mo Tapanahese, lo re: ‘Ikemise, o ipaakanye; gonne tšhaka e supuditse mo tikologong ya gago.’

¹⁵Ana ba ba thata ba gago ba kgopholetswe koo ka ntlha yang? Ga ba a ka ba ema, ka gonne Jehofa o ba kgophotse.

¹⁶O ne a kgopisa ba le bantsi, ee, ba ne ba welana; mme ba re: ‘Nanogang, a re boeleng kwa bathong ba ga rona, le kwa lefatsheng la ga rona, re tswe mo tšhakeng e e patikang.’

¹⁷Ba ne ba kua gone, ba re: ‘Faro, kgosi ya Egepeto ke modumo fela, o lesitse lobaka lo lo laotsweng lwa feta.’

¹⁸“Jaaka ke tshedile, go bua Kgosi e leina la yone e leng Jehofa wa masomosomo, a re: Ruri jaaka Tabore a ntse mo gare ga dithaba, le jaaka Karemele a ntse fa lewatleng, ene o tlaa tla jalo.

¹⁹Wena ngwana wa mosetsana yo o agileng mo Egepeto, ipaakanye go tla o ya botshwarong; gonne Nofe o tlaa nna tshwafalo fela, o tlaa fisiwa, a tlhoka monni.

²⁰“Egepeto ke kgomo ya moroba e ntle thata; mme tshenyego e e tswang ntlheng ya botsheka e tsile, e tsile.

²¹Banna ba gagwe ba ba thapilweng ka tuelo ba ntse jaaka dinamane tse di otlilweng mo gare ga gagwe; gonne le bone ba buseditswe kwa morago, ba tshabile mmogo, ga ba a ka ba ema; gonne letsatsi la tatlhego ya bone le tsile mo go bone, motlha wa tshekiso ya bone.

²²“Mokgwasa wa one o tlaa tsamaya jaaka wa noga; gonne ba tlaa tsamaela gongwe ka ntwa, ba tlaa mo tlhasela ka dilepe, jaaka baremi ba ditlhare.

²³Ba tlaa rema sekgwa sa gagwe, go bua Jehofa, le fa se sa kake sa hukudiwa; ka gonne ba feta tsie, ba sena palo.

²⁴Morwadia Egepeto o tlaa tlhabisiwa ditlhong; o tlaa tsenngwa mo seatleng sa batho ba botsheka.”

²⁵Jehofa wa masomosomo, Modimo wa Iseraele, a re: “Bonang, ke tlaa kgopholola Amone wa No, le Faro, le Egepeto, a na le medimo ya gagwe, le dikgosi tsa gagwe; e bong Faro le ba ba ikanyang mo go ene.

²⁶Ke tlaa ba tsenya mo seatleng sa ba ba batlang botshelo jwa bone, le mo seatleng sa ga Nebukatenesare kgosi ya Babilone, le mo seatleng sa batlhanka ba gagwe; mme morago ga moo o tlaa nnwa jaaka mo metlheng ya bogologolo,” go bua Jehofa.

²⁷“Wena Jakobe motlhanka wa me, o se ka wa boifa, se rerege, wena Iseraele; gonne bona, ke tlaa go boloka o le kwa kgakala, le ba losika lwa gago ba le kwa lefatsheng la botshwaro jwa bone. mme Jakobe o tlaa boa, mme o tlaa nna mo thagamong le mo boiketlong, mme ga go na ope yo o tlaa mmoifisang.

²⁸Jakobe motlhanka wa me, o se ka wa boifa, go bua Jehofa; gonne ke na nao; gonne ke tlaa khutlisetsa ruri merafe e ke go leleketseng kwa go yone, mme wena ga nketla ke go khutlisetsa ruri; mme ke tlaa go siamisa ka tekanyo, ga nketla ke go lesa gope o sa kgopololwa.”