Lamentations 3

¹Ke nna monna yo ke bonyeng pogiso ka thupa ya go šakgala ga gagwe.

²O nkgogile, o ntsamaisitse mo lefifing e seng mo leseding.

³Ruri o tlhola a busetsa letsogo la gagwe go tlhabana le nna gangwe le gape motshegare otlhe.

⁴O onaditse nama ya me le letlalo la me; o robile marapo a me.

⁵O agile dikago tsa go tlhabana le nna, mme o ntikanyeditse ka mo go galakang le ka tapisego.

⁶O mpatikile go aga mo mafelong a a lefifi, jaaka ba ba sa bolong go swa.

⁷O ntsentse gare ka logora, ga ke na go tswela kwa ntle; ketane ya me o e ketefaditse.

⁸Ee, ya re fa ke goa ke kuela thuso, a tswalele morapelo wa me kwa ntle.

⁹O kganetse ditsela tsa me ka dithako tsa maje a a betlilweng, o sokamisitse ditsela tsa me.

¹⁰Mo go nna o ntse jaaka bera e e laletseng, jaaka tau mo mafelong a boiphitlhelo.

¹¹O fapositse ditsela tsa me, o nkgagogantse; o ntshwafaditse.

¹²O laetse bora jwa gagwe, o ntlhomile sekonopiwa sa go fulwa ka motswi.

¹³O tsenyeditse metswi ya mokotlopo wa gagwe mo diphilong tsa me.

¹⁴Ke dule setshego mo bathong botlhe ba me, le sefela sa bone motshegare otlhe.

¹⁵O ntladitse bogalaka, o ntlopetse ka longana.

¹⁶O bile o nthobile meno ka lošagarana, o nkhurumeditse ka melora.

¹⁷O tloseditse mowa wa me kgakala le kagiso; ka lebala tlhogonolofalo.

¹⁸Ka re: “Thata ya me e nyeletse, le tebelelo ya me mo go Jehofa.”

¹⁹Gopola pogisego ya me le manyobonyobo a me, longana le santlhokwe.

²⁰Mowa wa me o sa ntse o di gopotse, mme o obegile mo teng ga me.

²¹Ke a ikgakolola go mo, mme ke gone ke nang le tsholofelo.

²²Fa e bo ne ne re sa nyelediwe jaana ke ka ntlha ya mapelonomi a ga Jehofa, le ka go bo matlhomoga pelo a gagwe a sa tlhaele.

²³A ntse maša ka meso le meso; boikanngo jwa gago bo bogolo.

²⁴“Jehofa ke kabelo ya me,” go bua mowa wa me: “ke gone ke tlaa solofelang mo go ene.”

²⁵Jehofa o molemo mo go ba ba mo lebelelang, le mo moweng o o mmatlang.

²⁶Go molemo gore motho a solofele a be a lebelele poloka ya ga Jehofa a iketlile fela.

²⁷Go molemo mo monneng go rwala jokwe mo bokaung jwa gagwe.

²⁸A a dule a le esi, a didimale ka a e beile mo go ene.

²⁹A a beye molomo wa gagwe mo loroleng; e tle e re kgotsa go bo go na le tsholofelo.

³⁰A a neele yo o mo tlhanyang lesama la gagwe; a a tladiwe kgobo, e tlale.

³¹Gonne Morena ga a ketla a latlhela ruri.

³²Gonne le fa a hutsafatsa, o tlaa tlhomoga pelo ka fa bontsing jwa mautlwelobotlhoko a gagwe.

³³Gonne ga a bogise ka go rata, le fa e le go hutsafatsa bana ba batho.

³⁴Go gatakela bagolegwi botlhe ba lefatshe,

³⁵go faposa tshiamelo ya monna fa pele ga sefatlhogo sa Mogodimodimo,

³⁶go phetsolela motho mafoko a gagwe, a a sekwang, dilo tse, Morena ga a di rate.

³⁷E mang yo o buang, mme go dirafale, fa Morena a sa laola jalo?

³⁸Mo molomong wa Mogodimodimo a ga go tle go tswe bosula le molemo?

³⁹Ana motho yo o tshedileng o ngongoregelang, e le motho, ka ntlha ya go belediwa dibe tsa gagwe?

⁴⁰A re kheleiseng re lekeng ditsela tsa rona, re be re sokologele mo go Jehofa.

⁴¹A re tsholeletseng Modimo mo magodimong dipelo di na le diatla tsa rona.

⁴²“Re tlodile, re tsuoletse; ga o a re itshwarela.

⁴³“O re khurumeditse ka bogale, wa re konatelela; o bolaile, ga o a tlhomoga pelo.

⁴⁴O ikhurumeditse ka leru, gore morapelo wa rona o se le phololele.

⁴⁵O re dirile ra nna jaaka mokgona le se se latlhwang mo gare ga ditšhaba.

⁴⁶Baba botlhe ba rona ba re atlhamoloseditse melomo.

⁴⁷Poifo le molete di re tletse, le pheretlho le tshenyo.

⁴⁸Leitlho la me le elela dinoka tsa metsi, ka ntlha ya tshenyego ya morwadia batho ba me.

⁴⁹“Leitlho la me le a tsholola, ga le khutle, ga go kgaoge gope.

⁵⁰Go tsamaye Jehofa a okomele, a lebe a le kwa legodimong.

⁵¹Leitlho la me le tlhokofatsa mowa wa me, ka ntlha ya bomorwadia motse wa gaetsho otlhe fela.

⁵²Ba e leng baba ba me fela e seng ka sepe, ba ntelekile mo go botlhoko jaaka nonyane.

⁵³Ba nkgaoletse botshelo mo moleteng, ba latlhetse letlapa godimo ga me.

⁵⁴Metsi a ne a elela godimo ga tlhogo ya me; ka re: ‘Ke kgaotswe.’

⁵⁵“Ka bitsa leina la gago Jehofa, ke le mo moleteng o o kwa tengteng.

⁵⁶O ne wa utlwa lentswe la me; o se ka wa subela phegelo ya me le go goa ga me tsebe.

⁵⁷O ne wa atamela mo motlheng o ke go biditseng ka one wa re: ‘Se boife.’

⁵⁸“Morena, o mpueletse mafoko a mowa wa me a tsheko; o rekolotse botshelo jwa me.

⁵⁹Jehofa, o bonye patikego ya me; a ko o atlhole mafoko a me.

⁶⁰O bonye pusoloso yotlhe ya bone, le maano otlhe a ba a ntogetseng.

⁶¹O utlwile kgobo ya bone, Jehofa, le maano otlhe a ba a ntogetseng;

⁶²le dipounama tsa ba ba ntsogologetseng, le go akanya ga bone ka ga me motshegare otlhe.

⁶³Leba go dula ga bone, le go nanoga ga bone; ke ntse sefela sa bone fela.

⁶⁴“Jehofa, o tlaa ba naya tuelo ka fa tirong ya diatla tsa bone.

⁶⁵O tlaa ba naya kgwalalo ya pelo, phutso ya gago e tlaa nna mo go bone.

⁶⁶O tlaa ba konatelela mo bogaleng, o tlaa ba senyetsa ruri ba tloge fa tlase ga magodimo a ga Jehofa.”