Lamentations 4

¹Ana gouta e kgonne jang! Gouta e e itshekileng thata e fetogile jang? Maje a felo ga boitshepo a thelegetse fa dibaeng tsa mebila yotlhe fela.

²Bomorwa Sione ba ba tlhekeeditsweng, ba ba tshwantshiwang le gouta e e itshekileng, ba kaiwa jang jaaka dinkgwana tsa letsopa, tiro ya diatla tsa mmopi wa dipitsa!

³Le e leng bophokoje ba tle ba ntshe letsele ba amuse bana ba bone, morwadia batho ba me o fetogile bolalome, o ntse jaaka bontšhe mo nageng.

⁴Loleme lwa ngwanyana yo o anyang lo ngaparela magalapa a gagwe ka lenyora, banyana ba lopa senkgwe, mme ga go na motho ope yo o se ba ngathelang.

⁵Ba ba kileng ba ja mo letlepung ba bile ba swafetse mo mebileng, ba ba otlilweng ba apere bohibidu jo bo letlhololo ba bile ba ngaparetse dithotobolo.

⁶Gonne boikepo jwa morwadia batho ba me bo feta boleo jwa Sotoma, o o ribegeditsweng ka ponyo ya leitlho, go sa bewa diatla dipe mo go ene.

⁷Batho ba gagwe ba batona ba kile ba ne ba itshekile bogolo go kapoko, ba le basweu bogolo go maši; mo mmeleng ba ne ba le bohibidu bogolo go korala, go redimoga ga bone go ne go ntse jaaka ga safire.

⁸Ponalo ya bone e ntsho bogolo go magala; ga ba itsiwe mo mebileng, letlalo la bone le ngaparetse marapo a bone; le sosobaganye, le ntse jaaka logong fela.

⁹Ba ba bolawang ka tšhaka ba gaisa ba ba bolawang ke go bopama; gonne bao ba tlhorega fela, ba topetswe ke go tlhoka maungo a masimo.

¹⁰Diatla tsa basadi ba ba pelonamagadi di apeile bana ba bone tota; e ne e le dijo tsa bone mo tshenyegong ya morwadia batho ba me.

¹¹Jehofa o dirafaditse tšararego ya gagwe, o goromeditse bogale jwa gagwe jo bo tukang; o tshubile molelo mo Sione o o laitseng metheo ya teng.

¹²Dikgosi tsa lefatshe ga di a ka tsa dumela, le fa e le banni botlhe ba lefatshe, fa moganetsi le mmaba ba ka tsena mo dikgorong tsa Jerusalema.

¹³Ke ka ntlha ya maleo a baperofeti ba gagwe, le maikepo a baperesiti ba gagwe, ba ba tsholotseng madi a basiami mo gare ga gagwe.

¹⁴Ba kaila fela jaaka difofu mo mebileng, ba leswefetse ka madi, batho ba bile ba retelelwa ke go ama diaparo tsa bone.

¹⁵Ba ne ba ba goelela, ba re: “Tlogang, lo maswe! Tlogang, tlogang, se ameng.” E rile ba tshaba ba timela, batho ba bua mo merafeng ba re: “Ga ba ketla ba tlhola ba jaka mono.”

¹⁶Bogale jwa ga Jehofa bo ba kgaogantse; ga a ketla a tlhola a ba tlhokomela. Ga ba a ka ba tlotla sebele sa baperesiti, ga ba a ka ba ya ntlheng ya bagolwane.

¹⁷Matlho a rona a sa ntse a bokalala ka go senka thuso ya rona ya lefela; mo go lebeleng ga rona re lebeletse morafe o o ne o sa kake wa boloka.

¹⁸Ba tsoma dikgato tsa rona, re bile re retelelwa ke go tsamaya mo mebileng ya rona. Bokhutlo jwa rona bo gaufi, malatsi a rona a fetile; gonne bokhutlo jwa rona bo fitlhile.

¹⁹Bakonatedi ba rona ba ne ba le bofefo bogolo go bontswi ba batona ba loapi; ba re lelekile mo dithabeng ba re laletse mo gare ga naga.

²⁰Mowa wa dinko tsa rona, e bong motlodiwa wa ga Jehofa o ne a tshwarwa ka mamena a bone; ene yo re buileng ka ga gagwe, ra re: “Re tlaa aga mo merafeng re le fa tlase ga moriti wa gagwe.”

²¹Wena morwadia Etome, yo o agileng mo lefatsheng la Use, itumele o ipele; senwelo se tlaa ralalela le kwa go wena; o tlaa tagwa, mme o tlaa itsola.

²²Kgophololelo ya boikepo jwa gago e dirafetse, wena morwadia Sione; ga a ketla a tlhola a go isa botshwarong; o tlaa sekisa boikepo jwa gago, wena morwadia Etome; o tlaa senola maleo a gago.